Cuarta edición do programa «Software libre nos centros penitenciarios de Galicia» (2017)

Os/as voluntarios/as de Melisa iniciaron o mes pasado de setembro a cuarta edición do programa de difusión e formación en tecnoloxías libres nos centros penitenciarios de Galicia.

Este programa de actividades arrancou no ano 2013 como parte das actividades que leva a cabo dito colectivo para a difusión das tecnoloxías libres a diferentes sectores sociais da nosa comunidade. Nestes últimos anos foron realizadas diferentes actividades en cada un dos centros penitenciarios de Galicia, así como nos centros CIS de Vigo e A Coruña.

Na presente edición, estanse impartindo sesións formativas no centro penitenciario de Monterroso co obxectivo de formar aos participantes na configuración, montaxe e mantemento dunha rede local xestionada con sistemas operativos libres.

Un grupo reducido de internos está recibindo clases prácticas impartidas polos voluntarios de Melisa, Rafael Rodríguez e Miguel Rodríguez, nas que poden coñecer os pasos necesarios para instalar un sistema operativo libre nos equipos da aula, así como a súa configuración dentro da rede local. Todos estes talleres teñen un carácter totalmente práctico, para que poidan adquirir os coñecementos necesarios para o seu posterior mantemento da infraestrutura sen precisar apoio externo. Son os internos os que preparan o cableado necesario, canalizano a través da aula, para conseguir conectar todos os equipos ao concentrador central (switch). Unha vez que a rede local estea operativa, vaise engadir a dita rede un dos servidores que foi cedido pola AMTEGA o ano pasado, e que se encargará de realizar algunha das funcións máis típicas dun equipo destas características; servidor de ficheiros, xestión de usuarios, aula virtual, impresión en rede ou servidor web.

Coa colaboración de:

Esta actividade forma parte das actividades que Melisa realiza no marco do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2017 da Xunta de Galicia.

A asociación de usuarios de software libre MeLiSA porá en marcha unha aula virtual no Centro Penitenciario de A Lama

A asociación de usuarios de software libre MeLiSA porá en marcha unha aula virtual no Centro Penitenciario de A Lama

 

O Programa Voluntariado Dixital da Xunta, en colaboración coa Asociación de Usuarios de Software Libre da Terra de Melide, MeLiSA, porán en marcha en setembro un proxecto piloto para dotar ao centro penitenciario de A Lama dun servidor onde poder instalar unha aula virtual para os reclusos.
O obxectivo desta iniciativa é conseguir un mellor mantemento da infraestrutura informática, que permita aos internos traballar nunha rede local e compartir a mesma información nos diferentes postos de traballo. Unha vez rematada esta primeira fase, e despois de realizar as primeiras probas, trasladaranse os resultados ao organismo central de institucións penitenciarias de Madrid, para que avalíen se pode ser exportable outros centros do país.
Na actualidade ningún centro penitenciario de España conta cun equipamento deste tipo e os resultados do proxecto que se inicia na Lama servirá de referencia para o resto de centros do estado.
Esta experiencia levarase a cabo cos reclusos que participaron nos cursos formativos que veñen impartindo os voluntarios de MeLiSA dentro das actividades do Programa de Voluntariado Dixital da Xunta.

Obradoiros en A Lama e Monterroso

Durante este ano, voluntarios da Asociación MeLiSA celebraron a terceira edición da iniciativa “Tecnoloxía e software libre en centros penitenciarios galegos” impartindo dous obradoiros prácticos de montaxe e configuración de equipos nos centros de A Lama e Monterroso.
O proxecto ten como obxectivo achegar as novas tecnoloxías e o software libre aos sete centros penitenciarios existentes en Galicia, a través da formación de reclusos en novas tecnoloxías e software libre.
No obradoiro de A Lama, rematado o pasado 29 de xullo e no que participaron un total de 8 internos, traballouse sobre dous equipos cedidos pola AMTEGA que pasarán a formar parte do parque informático do centro.

Código Cero: https://codigocero.com
Data: Venres, 14 de agosto do 2015
URL: https://codigocero.com/A-asociacion-de-usuarios-de-software-libre-MeLiSA-pora-en-marcha-unha-aula

En marcha a terceira edición do programa formativo con software libre para os reclusos galegos (2015)

En marcha a terceira edición do programa formativo con software libre para os reclusos galegos (2015)

Temos nova convocatoria do programa galego alfabetización dixital para os presos dos cárceres galegos, iniciativa impulsada pola Asociación de Usuarios de Software Libre de Terra de Melide (MeLiSA) ao abeiro do Programa de Voluntariado Dixital da Xunta da axencia AMTEGA. Así, este martes 27 de xaneiro ponse en marcha, oficialmente, a terceira edición desta nova achega de actividades formativas e dinamización, actividades que teñen as virtudes extra de realizárense onde máis se precisan e, ademais, ao abeiro do coñecemento e a informática sen barreiras. A terceira edición dos Obradoiros Tecnolóxicos en Centros Penitenciarios de Galicia arrancan cun obradoiro de montaxe, reparación e configuración de ordenadores con software libre no Centro de Teixeiro.

Este obradoiro terá continuidade até o mes de outubro, “para poder chegar aos sete centros penitenciarios galegos”, sinala MeLiSA.

Como dixemos, esta iniciativa encádrase dentro das actividades do Programa de Voluntariado Dixital da Xunta de Galicia en colaboración coa asociación de Melide para favorecer a inserción laboral da poboación reclusa galega a través das TIC. Este proxecto formativo nos centros penitenciarios chega á súa terceira edición despois de levarse a cabo durante os anos 2013 e 2014, edicións “nas que que se realizaron diversas accións formativas nos cinco centros penitenciarios galegos, e os dous CIS, da Coruña e de Vigo, formando a un total de 83 internos, axudando á súa inserción no mercado laboral a través da formación en diferentes áreas TIC”, engade MeLiSA.

Equipos para reparar

Respecto á actividade coa que comeza a terceira convocatoria, dicir que un total de 15 internos pertencentes ao módulo de respecto serán os destinatarios do obradoiro en Teixeiro, no que se utilizarán oito computadores que foron doados polo colectivo de usuarios de software libre con sede na dita vila coruñesa, así como diferente material informático para poder realizar reparacións se é preciso. “Os participantes neste taller”, sinala o colectivo, “poderán aprender a montar un ordenador persoal identificando os diferentes compoñentes do mesmo, detectar as avarías máis comúns, e realizar labores de mantemento dos mesmos”. Ao remataren, explícase, estarán en disposición de instalar e configurar un sistema operativo GNU/Linux, co propósito de que estes equipos poidan formar parte dunha nova aula de informática no módulo de respecto.

Os voluntarios de Melisa encargados de impartir estes obradoiros serán Rafael Rodríguez, Jorge Lama e Salvador Tabarés, os cales xa contan con experiencia neste tipo de talleres, tanto no centro de Teixeiro coma no resto de centros penitenciarios da nosa comunidade autónoma.

Código Cero. https://codigocero.com
Data: luns, 26 de xaneiro do 2015
URL: https://codigocero.com/A-asociacion-de-usuarios-de-software-libre-MeLiSA-pora-en-marcha-unha-aula

 

Segunda edición dos “Talleres tecnolóxicos e software libre nos cárceres de Galicia” (2014)

Segunda edición dos “Talleres tecnolóxicos e software libre nos cárceres de Galicia” (2014)

O colectivo de usuarios de software libre da Terra de Melide, MeLiSA, iniciou a semana pasada no Centro Penitenciario de Teixeiro a segunda edición dos Talleres tecnolóxicos e software libre nos cárceres de Galicia. Segundo informa a asociación, trátase dunha nova achega de formación en tecnoloxías e programación aberta directamente dirixida a combater fendas dixitais e, en última instancia, botar man da informática sen barreiras para afianzar a vindeira inserción social e laboral dos participantes nestes obradoiros. Lembrar que MeLiSA retoma o fío do importante traballo despregado o ano pasado en cinco centros penitenciarios e dous CIS (Centros de Inserción Social) da nosa terra.

Máis en detalle, “o obxectivo principal deste proxecto é levar aos internos dos centros un curso de formación para que poidan coñecer as características principais dos programas informáticos que se liberan baixo unha licenza libre”. Os contidos dos cursos adáptanse aos recursos dispoñíbeis en cada centro, así como ao perfil dos internos. Así, no centro de Teixeiro está a ser impartido un curso de alfabetización dixital e reparación de equipos con GNU/Linux dirixido aos internos do módulo de respecto, e o módulo de mulleres. Polo que atinxe aos CIS, os obradoiros tamén teñen as súas particularidades, partindo da base de que os internos gozan nestes centros dun réxime aberto que lles permite acudir ás aulas da rede CeMIT de AMTEGA para recibir formación complementaria do uso de diferentes servizos dispoñíbeis a través de Internet (correo electrónico, busca de emprego, uso básico de redes sociais, etc.).

Segundo informa a asociación de Melide, o responsábel do taller que remata o este 16 de xullo en Teixeiro é Salvador Tabarés, voluntario do colectivo de software libre. Outros voluntarios son Rafael Rodríguez e Miguel Bouzada, que serán os encargados de impartir os obradoiros en A Lama e máis no CIS de Vigo, respectivamente. Para os meses de setembro e outubro están programados o resto de talleres nos centros de A Lama, Pereiro de Aguiar, Monterroso e Bonxe, así como nos CIS de A Coruña e Vigo.
Esta actividade, forma parte das actividades que MeLiSA realiza ao abeiro do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2014 da Xunta de Galicia. Ao mesmo tempo, conta coa colaboración e apoio do equipo de Voluntario Dixital.

 

Código Cero. https://codigocero.com
Data: luns, 14 de xullo do 2014
URL: https://codigocero.com/A-asociacion-de-usuarios-de-software-libre-MeLiSA-pora-en-marcha-unha-aula